VOV4.Jarai - Tlam lơ 26/6, Khua dêh čar ơi Phạm Minh Chính hăng Khul khua mơng Kơnuk kơna hơmâo mông ngă bruă hăng khua mua ƀon prong Đà Nẵng. Khua dêh čar ta djă pioh, bơni kơ hơdôm tơlơi gir run hăng boh than ba glăi prong mơ̆ Ping gah, gong gai hăng mơnuih ƀon sang ƀon prong Đà Nẵng hơmâo ngă, gum pơgôp amăng tơlơi klă hiam mơng lŏn ia ta, biă ñu amăng bruă pơhlôm pơgang klin kheng hăng rŭ glăi tơlơi bơwih ƀong huă mơnuih mơnam.

Khua dêh čar ơi Phạm Minh Chính ngă bruă hăng khua mua ƀon prong Đà Nẵng.

Amăng hrơi blan pơ anăp, Khua dêh čar ta kiăng: Ƀon prong Đà Nẵng ăt pơhlôm djŏp mơnuih mă bruă, gơnam yua gah ia jrao gun đah mơng ngă klă bruă ia jrao ƀơi ƀon prong; tlâ̆o vaccine kơ čơđai yŭ 5 thun rơnuk rơnua klă hiam. Pơphun ngă klă, tŭ yua tui Tơlơi pơtrun mrô 43-NQ/TW mơng Ding jum kơđi čar kơ akŏ pơdong hăng pơđĭ kyar ƀon prong Đà Nẵng truh thun 2030 hăng Tơlơi pơtrun mrô 119/2020/QH14 mơng Ƀirô khua git gai pơ ala mơnuih ƀon sang dêh čar kơ bruă ngă lăng hlâo pơphun hơbô̆ bruă gong gai plơi prong hăng sa, dua tơlơi phiăn, hơdră djru phara đah mơng dưi pơđĭ kyar phrâo.

Siu H’Mai: Pơblang