Pơhiăp ƀơi mông ngă bruă Khua dêh čar ơi Phạm Minh Chính pơsit, Anom bruă čih hră pơhing jing anih pôr pơthâo tơlơi pơmin gru grua hiam mơng Ping gah, amăng anun, Khul mơnuih čih hră pơhing yôm biă mă amăng bruă gum pơgôm, iâu pơthưr, pơđĭ tui pran jua kơjăp bruă kơđi čar, pơtô kơjăp bruă mă, tơlơi pơmin mă bruă mơng mơnuih čih hră pơhing. Khua dêh čar ơi Phạm Minh Chính bơni hơ-ơč tơlơi hiam hloh hăng lăng yôm, pơpŭ kơ hơdôm tơlơi hơmâo ngă prong, yôm mơng Khul čih hră pơhing Việt Nam hăng abih bang mơnuih čih hră pơhing amăng đơ đam dêh čar ta.

Khua dêh čar kiăng Khul čih hră pơhing Việt Nam kơjăp hloh amăng bruă anăp brơi jơlan mă bruă kơ ƀing hyu mă tơlơi pơhing kơsem min hơdră ngă bruă, gir gum hrŏm bruă pơtô pơblang hơdôm tơlơi pơtrun djru mơnuih ƀon sang; pơtrut pơplih phrâo rơgơi kơ hơdôm tơlơi kiăng čih, pơđĭ tui boh tŭ yua mơng tơlơi pơhing, mơnuih ƀon sang hmư̆ tơlơi pơhing djơ̆; gir akŏ pơdong mơnuih čih tơlơi pơhing kơjăp bruă; ƀư̆ pơkra hơdôm tơlơi pơmin soh sat, pơtrut tui tơlơi klă hiam tơlơi khăp pap amăng bruă pôr pơhing. Hră pơhing khŏm nao hlâo amăng bruă ƀuh, pơpŭ kơ mơnuih phrâo mă bruă rơgơi, mă bruă klă, mă anŏ hiam lŏm lui anŏ sat, mă anŏ klă lŏm tui anŏ ƀu klă, pơtrut pran jua, bang hyu anŏ hiam amăng kual plơi pla. Ngă klă bruă krăp lăng, lăi glăi; brơi tơlơi pơhing sit, tañ, rơđah rơđông.