VOV4.Jarai - Tlam lơ 19/8, Khua dêh čar ơi Phạm Minh Chính ngă bruă mơng ataih kơ bruă pơđĭ kyar anih sĭ mơdrô hăng hơdôm anom bruă pơ ala tơlơi sĭ mơdrô Việt Nam pơ čar rơngiao. Ƀơi mông jơnum, Khua dêh čar hrŏm hăng Ding jum pơkra gơnam sĭ mơdrô, hơdôm ding jum, anom bruă jơnum lăng amăng tivi hăng anom bruă Sĭ mơdrô prong Việt Nam pơ čar rơngiao hơmâo lăi nao hơdră pơđĭ tui anŏ klă, tŭ yua bruă sĭ mơdrô, pơđĭ kyar hăng ba sĭ pơ lu anih, djơ̆ hăng tơlơi kiăng ră anai. Hơdôm anom bơwih ƀong prong Việt Nam pơ dêh čar tač rơngiao hơmâo lăi pơthâo glăi tơlơi gêh gal, djơ̆ hăng tơlơi kiăng mơng anih blơi yua; tơlơi kiăng mơng hơdôm anih sĭ mơdrô; hơdră ngă bruă kiăng djơ̆ hăng tơlơi kiăng mơng anih bơwih ƀong sĭ mơdrô.

Mông mă bruă

Tui hăng tơlơi lăi pơthâo mơng Ding jum pơkra gơnam sĭ mơdrô, thun 2021, prăk pơhrui glăi mơng Việt Nam hơmâo rơbêh 670 klai dolar Mi, ba Việt Nam mut amăng mrô 20 boh dêh čar hơmâo tơlơi bơwih ƀong hăng dêh čar tač rơngiao prong hloh ƀơi rŏng lŏn tơnah. 7 blan akŏ thun 2022, prăk pơhrui glăi mơng bruă sĭ mơdrô mơng Việt nam hơmâo rơbêh 433 klai dolar Mi. Him lăng amăng ha thun, prăk pơhrui glăi amra hơmâo năng ai 800 klai dolar, ba Việt Nam hrưn đĭ dong mrô 10 ƀudah 15 boh dêh čar hơmâo tơlơi bơwih ƀong hăng tač rơngiao.

Siu H’Mai: Pơblang