Rơngôt hrŏm dơlăm truh kơnung djuai hơdôm bôh sang anô̆ hmâo mơnuih djai, rơngiă theng, Khua dêh čar lăi pơthâo hăng hơdôm tơlơi tơnap, rơngiă ngiom mơ̆ng mơnuih ƀôn sang kual hơjan ia ling dăo ngă. Khua dêh čar rơkâo hơdôm ding jum, gơnong bruă gum hrŏm kơjăp hăng gong gai plơi pla pioh pơtrut tañ rơnoh bruă pơsir anô̆ răm rai, ƀu pioh mơnuih ƀôn sang rơpa, kơƀah ia jrao, ia hơdjă yua hăng klin ruă gluh đĭ tơdơi kơ ia ling dăo.

Hơdôm anih anom jơlan nao rai lŏn tơhroh khom tañ hơkrŭ pơkra glăi, rit đuăi neh wa nao pơ̆ anih pơhlôm. Khom pơsir glăi bruă ngă đang hmua, hơdôm anih anom sang hră hmâo răm rai ăt khom tañ pơplih pơkra glăi mơn kơ ƀing ană tơčô prăp lui mut thun hrăm phrâo. Hơdôm bôh sang ia jrao să, anih pơjrao tơlơi duam ruă kơ mơnuih ƀôn sang tơdah bơdjơ̆ nao ăt khom pel ĕp, pơsir hmao tlôn./.