VOV4.Jarai - Mơguah lơ 7/8, Khua dêh čar ơi Phạm Minh Chính mă bruă hăng Khua mua hơdôm ding jum, gơnong bruă, anom bruă man pơkra hăng ƀôn prong Hà Nội kiăng kơ pơsir hĭ hơdôm bruă tơnap tap, gun găn, pơtrut tañ bruă man pơkra “Jơlan rơdêh treng amăng ƀôn prong Hà Nội, ară jơlan mơng Nhổn - Ga Hà Nội”. Tơdơi kơ nao pel ĕp ƀơi hơdôm anih man pơkra, Khua dêh čar ơi Phạm Minh Chính hơmâo mông mă bruă hăng ƀôn prong Hà Nội, djop ding jum bơdjơ̆ nao, anom bruă man pơkra jơlan rơdêh treng ƀôn prong, ară jơlan mong Nhổn - Ga Hà Nội kiăng kơ pơsir hĭ hơdôm tơlơi tơnap tap, gun găn bơdjơ̆ nao bruă man pơkra. Đĭ pơhiăp amăng mông jơnum, Khua dêh čar ơi Phạm Minh Chính lăi rơđah, tơlơi ngă kơ bruă man pơkra kaih, pơhrua prăk kak lĕ yua mơng anom bruă tuh pơ alin, ƀôn prong Hà Nội, hơdôm anom bruă črâo ba, anom bruă man pơkra; tơlơi gum hrŏm mơng djop ding jum, anom bruă hăng Hà Nội kiăng gơgrong ngă tui hơdôm bruă jao hơmâo pơsit laih, anăm ngă brơi ƀuh, pơtah tai, tơdah hơmâo tơlơi gun găn, anom bruă kiăng tum pơƀut djop anom bruă bơdjơ̆ nao pơsir hĭ tui tơlơi pơkă mơng Kơnuk kơna.

Siu Đoan: Pơblang