VOV4.Jarai - Mơguah lơ 31/7,  Khua dêh čar ơi Phạm Minh Chính pel ĕp lăng Rơwang bruă pơhư prong bơwih ƀong rơwang 2 Sang măi pơkra pơsơi Thái Nguyên. Dưi pơphun mơng thun 2007, hăng abih bang prăk mă yua blung a 3.800 klai prăk, samơ̆ rơwang bruă anai truh ră anai akă giong mơn hăng dô̆ hmâo lu tơlơi tơnap, tơlơi gun đôč.

Khua dêh čar pel ĕp lăng Rơwang bruă pơhư prong bơwih ƀong rơwang 2 Sang măi pơkra pơsơi Thái Nguyên

Tơdơi kơ hyu hơduah ĕp lăng, Khua dêh čar hmâo git gai mông mă bruă hăng hơdôm ding jum, gơnong bruă, ƀirô, plơi pla, anom bơwih ƀong kiăng hmư̆ tơlơi lăi pơthâo glăi, tơlơi gum pơhiăp, ba tơbiă mơng hơdôm bơnah bơdjơ̆ nao. Khua dêh čar lăi rơđah, bruă mă yôm phăn hloh lĕ ĕp tañ jơlan pơsir klă hloh kơ rơwang bruă pioh lăi pơthâo glăi kơ hơdôm gưl hmâo tơlơi dưi lăng glăi, pơsit, tơdơi kơ lăng glăi, bơkơtuai, pơblang tŏng ten hluai tui bôh nik hmâo, djơ̆ hơdră phiăn, pơhlôm pơkrem hloh, ba glăi bôh tơhnal bơwih ƀong dlông hloh kơ kơnuk kơna hăng anom bơwih ƀong. Tơdơi kơ hmư̆ tơlơi lăi pơthâo glăi tơlơi, Khua dêh čar lăi rơđah, anai lĕ rơwang bruă pơhrư̆i sui, kaih rơnoh bruă lu thun khom đing nao pơsir pơđut tui tơlơi pơkă mơng tơlơi phiăn, kiăo tui hơdôm tơlơi črâo ba mơng Ding jum kơđi čar, klah čun pel ĕp./.

Siu H’ Prăk: Pơblang