Anai lĕ tal nao čuă dêh čar Khač blung a mơ̆ng ơi Phạm Minh Chính lơ̆m đĭ ngă khua dêh čar. Tal nao čuă anai, ba glăi boh tŭ yua hiam hăng tŭ mă lu bruă yôm. Đăo kơnang bruă kơđi čar mơ̆ng dua bơnah, kơtưn pơđĭ kơtang tui, ngă gêh găl kơ sa atur pơtrut kjăp kơtang hăng dơlăm hloh tơlơi ngă giăng mah rô nao rai hlom bom Việt Nam-Khač amăng rơnuk phrâo, kiăng ba glăi boh tŭ yua kơ mơnuih ƀôn sang dua bơnah. Dua bơnah ăt lêng kơ lăi pơtong, boh yôm phun kiăng kơtưn bruă đăo kơnang nao rai kơđi čar, pơsir hơdôm tơlơi kiăng lăp djơ̆ hăng wai lăng kjăp anŏ aka ƀu tŭ ư nao rai, ba tơlơi ngă giăng mah pŭ ƀăn yôm phăn kơplah wah Việt Nam hăng Khač pơđĭ kyar hơđong, tơpă, tŭ yua sui thun.

Hrŏm hăng bruă mă tal nao čuă sit nik anai, Khua dêh čar nao jơnum hrŏm hăng đĭ pơhiăp amăng mông bơkơtuai nao rai khua mua sang bruă sĭ mơdrô dua bơnah Việt Nam-Khač, hơmâo lu khua mua sang bruă sĭ mơdrô mơ̆ng dêh čar Khač jơnum hrŏm, bưp ƀing rơgơi kơhnâo ngă giăng mah hăng bưp ƀing khua mua ngă bruă sĭ mơdrô pơprong mơ̆ng dêh čar Khač, nao ĕp lăng anih pơdong plơi phrâo hiam Hùng An, sa boh anih pơblih phrâo hơdră mă bruă pơčeh phrâo dêh čar Khač ƀơi tơring čar Hà Bắc....ƀing khua mua sĭ mơdrô  gah dêh čar Khač lăng yôm anih anom hăng anŏ tŭ yua či tuh pơ alin ƀơi Việt Nam, laih dơ̆ng pơdah rai pran jua kiăng pok prong anom mă bruă tuh pơ alin ƀơi Việt Nam, pok prong anih tuh pơ alin lu hloh kơñ pơgi ni anăp.