VOV4.Jarai-Tơdơi kơ Anom bruă djă pioh jŭ yap dêh čar Mi pơđĭ rơnoh prăk kơmlai 0,75% mlam tom brơi laih anun djop sang bruă prăk dêh čar amăng kual Mi kô̆ hăng lu dêh čar pơkŏn lu wơ̆t pơđĭ prăk kơmlai pioh pơgăn  prăk rơngiă nua phrâo anai, mơguah lơ 28/7, Khua dêh čar ơi Phạm Minh Chính git gai jơnum hăng hơdôm čô khua ding jum, anom bruă dêh čar pơčrông sai ĕp hơdră gêh găl ƀơi anăp hăng sui thun pơ anăp, kiăng pơgăn prăk rơngiă nua, đah mơ̆ng hơđong bơwih ƀong huă amăng dêh čar, pơtrut rŭ glăi pơđĭ kyar bruă mă mơnuih mơnam bơwih ƀong huă amăng dêh čar.

Khua dêh čar lăi pơtă, tơlơi bơwih ƀong huă dêh čar ta hơmâo hnong pơkă pok pơhư prong, hnong ngă bruă aka lu, tơlơi gơgrong glăm ba aka ƀu kjăp ôh, yua kơ anun tơdah hơmâo tơlơi pơblih mă anet aneo đôč gah rơngiao adih, bơbeč prong biă mă kơ dêh čar ta. Ƀơi anăp kơ tơlơi anun, Khua dêh čar pơtrun hiăp kơ djop ding jum, anom bruă, tơring čar krăo lăng tong ten, thâo tum tơlơi pơhing, anăm ngă amưng ôh, pơđĭ tui tơlơi thâo pơblang rơđah, lăi lui hlâo, pơphun mă bruă hơmâo hơdră djơ̆ lăp pơsir hmao kru, djơ̆ rơ-ua, tŭ yua kơ dêh čar ƀơi anăp mơta hăng sui thun pơ anăp adih.

Nay Jek: Pơblang