VOV4.Jarai - Mơmŏt lơ 15/2, Khua dêh čar ơi Phạm Minh Chính pơhiăp telephôn hăng ơi Albert Bourla, Khua git gai grup Pfizer. Amăng mông pơhiăp telephôn, Khua dêh čar ơi Phạm Minh Chính pơpŭ bơni, lăng yôm grup Pfizer hăng Khua git gai Grup Pfizer amăng thun blan laih rơgao hơmâo gum hrŏm kjăp hăng hơdôm anom bruă ƀơi Việt Nam kiăng tañ jao vaccine hăng jao djop 51 klăk liều vaccine pơgang klin Covid-19 brơi kơ dêh čar Việt Nam tui tơlơi rơkâo mơng dêh čar Việt Nam amăng mông pơhiăp telephôn hăng Khua dêh čar lơ 20/8/2021.

Khua dêh čar brơi thâo, amăng hrơi blan laih rơgao Việt Nam hơmâo tŭ mă vaccine mơng Pfizer tlâ̆o brơi ƀing čơđai mơng 12-17 thun, truh ră anai, ară tal 1 hơmâo tlâ̆o brơi giăm 96%, ară tal 2 hơmâo tlâ̆o brơi giăm 90% hăng anai lĕ tơlơi gir run abih pran jua. Tơlơi anai ngă kơ ƀing čơđai hơđong pran jua lơ̆m pơwŏt glăi nao sang hră. Ƀơi anăp kơ tơlơi tơnap tap mơng klin kheng, kiăng pơhlôm brơi tơlơi suaih pral kơ ƀing čơđai hăng tŏ tui tŭ yua dong lơ̆m brơi čơđai pơwŏt glăi nao sang hră. Khua dêh čar rơkâo Khua git gai Pfizer đing nao pơtrut tañ bruă jao 22 klăk liều vaccine brơi kơ ƀing čơđai mơng 5 truh pơ pơgŭ 12 thun ƀơi Việt Nam amăng hơdôm hrơi giăm anai mơtăm.

Siu Đoan: Pơblang