VOV4.Jarai - Tlam lơ 1/3, Khua dêh čar ơi Phạm Minh Chính hơmâo iâu telephôn hăng ơi Kasper Rorsted, Khua grup bơwih ƀong Adidas lăi nao bruă pơtrut tui bruă pơkra, sĭ mơdrô mơng Adidas ƀơi Việt Nam. Ƀơi mông pơhiăp tom, Khua dêh čar đăo gơnang Grup bơwih ƀong Adidas amra dưi ngă lu tơlơi truh kih prong hloh dong laih anun pơtrut tui hloh dong bruă pơkra gơnam sĭ mơdrô ƀơi Việt Nam, wơ̆t hăng bruă ngă amuñ brơi hơdôm anom bơwih ƀong Việt Nam mut hrŏm dlăm hloh hăng bruă sĭ mơdrô mơng Adidas.

Khua dêh čar ơi Phạm Minh Chính.

Khua dêh čar rơkâo Grup bơwih ƀong pơtrut tui dong bruă djru brơi mơnuih ƀon sang, lăng ba tơlơi hơdip, tơlơi ngă bruă klă hloh kơ mơnuih mă bruă Việt Nam. Khua dêh čar lăi nao tơlơi kiăng ngă hlâo mơng Kơnuk kơna Việt Nam kơ đĭ kyar mơtah, plai ƀiă ngă hơƀak ayuh hyiăng, lăng yôm tơlơi kĭ pơkôl mơng Adidas kơ bruă pơkra gơnam sĭ mơdrô hơđong kơjăp pơlir nao hrŏm hăng pơgang ba ayuh hyiăng lŏn adai, mă yua apui lơtrik tŭ yua. Khua dêh čar čang rơmang Adidas amra gum pơgôp pơtrut tui tơlơi ngă hrŏm bơwih ƀong huă - sĭ mơdrô - tuh pơ plai kơplah wah Việt Nam hăng dêh čar Cộng hòa Liên bang Đức laih anun hăng Khul pơlir hơbit kual Mi Kô̆.

Siu H’Mai: Pơblang