Mông jơnum lăi pơthâo bruă dưm dăp pơđĭ kyar hăng pơtrut tuh pơ alin tơring čar Long An jing tơlơi yôm biă mă hăng bruă dưm dăp pơđĭ kyar tơring čar, iâu pơthưr abih bang tơlơi hơmâo, pơhưč tuh pơ alin, pơđĭ kyar bơwih ƀong huă mơnuih mơnam mơ̆ng tơring čar Long An amăng hrơi blan pơ anăp. Ƀơi mông jơnum, Khua ding jum dăp bruă hăng tuh pơ alin ơi Nguyễn Chí Dũng brơi Dăp bruă pơđĭ kyar tơring čar rơwang thun 2021-2030, lăng nao truh pơ thun 2050 kơ khua mua tơring čar Long An. Pơhiăp ƀơi mông jơnum, Khua dêh čar ơi Phạm Minh Chính lăi, tơring čar Long An pơƀut lu tơlơi gêh gal či pơđĭ kyar bơwih ƀong huă mơnuih mơnam tañ hăng hơđong kơjăp, jing pơhưč anom bruă tuh pơ alin amăng dêh čar wơ̆t hăng čar rơngiao.

Tơring čar Long An kiăng gir truh pơ thun 2030, jing anom bruă pơđĭ kyar hmar, tŭ yua, hơđong kơjăp gah kual Dơnung. Ăt amăng lơ 25/7 mơn, Khua dêh čar ơi Phạm Minh Chính hrŏm hăng grup mă bruă mơ̆ng Kơnuk kơna nao sem lăng kơčăo bruă pơkra jơlan wer mrô 3 ƀôn prong Hồ Chí Minh đuăi nao pơ Long An. Bruă man pơkra jơlan wer 3 ƀôn prong Hồ Chí Minh kiăng pơtruh nao rai hơdôm boh tơring čar, ƀôn prong kual bơwih ƀong phun gah Dơnung, akŏ pơdong plơi prong rơgơi, hơđong kơjăp, gum pơđĭ kyar bơwih ƀong huă - mơnuih mơnam mơ̆ng lŏn ia.