VOV4.Jarai -Khua dêh čar ơi Phạm Minh Chính phrâo kĭ kông điêng kơ bruă pơtrut djop Ding jum, gơnong bruă, gong gai ƀon lan ngă tui bruă jao ječ ameč pok pơhai jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam. Kông điêng čih rơđah: Kiăng pơhlôm pok pơhai khut khăt, ha amăng plĕ, djă pioh boh tŭ yua mơng jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam, Khua dêh čar rơkâo djop ding jum, gơnong bruă, gong gai pok pơhai khut khăt, tŭ yua ƀiă dong hơdôm bruă jao, hơdră bruă ba tơbiă amăng tơlơi pơtrun mrô 11 mơng Kơnuk kơna. Amăng thun blan laih rơgao, djop ding jum, gơnong bruă, gong gai ƀon lan hơmâo khut khăt pok pơhai ngă tui hơdôm bruă jao, hơdră bruă ba tơbiă amăng tơlơi pơtrun mrô 11 mơng Kơnuk kơna. Samơ̆ hrơi mông pơphun ngă truh ră anai dŏ kaih, biă mă ñu lĕ bruă pơtrun hơdôm hră pơ-ar črâo ba ngă tui, bơbeč nao bruă ngă tui hơdôm hơnong pơkă, hơdră bruă ba tơbiă amăng Jơlan hơdră. Khua dêh čar rơkâo Ding jum kơčăo bruă hăng tuh pơ alin, Ding jum pơtô pơjuăt hăng djop Ding jum, anom bruă kaih ngă pơgiong bruă jao amăng blan 3/2022 khŏm lăng glăi hăng khut khăt ngă tui, anăm brơi kaih dong tah.

Siu Đoan: Pơblang