Tui tơlơi pơkă, jơlan rơdêh treng Lào Cai – Hà Nội – Hải Phòng hmâo abih bang ataih 417 km, găn rơgao 9 bôh tơring čar (Lào Cai, Yên Bái, Phú Thọ, Vĩnh Phúc, Hà Nội, Bắc Ninh, Hưng Yên, Hải Dương hăng Hải Phòng); tô nao pơ̆ tơdrun tum păn jar kơmar Hải Phòng, tô nao rai bruă dŭ pơgiăng jar kơmar hăng Khač; djơ̆ tui tơlơi pơgiăng klă, tañ, gêh gal hăng pơhlôm.

Tơdơi kơ hmư̆ tơlơi lăi pơthâo glăi, Khua dêh čar rơkâo Ding jum dŭ pơgiăng jơlan nao rai hăng hơdôm ding jum, ƀirô bơdjơ̆ nao pơtrut tañ hloh dong rơnoh prăp lui lăi pơthâo rơwang bruă, amăng blan 1/2025 khom lăi pơthâo kơ Gong gai dêh čar pioh amăng blan 2/2025 lăi pơthâo kơ Khua pơ ala mơnuih ƀôn sang hơdră pơtrun tuh pơplai rơwang bruă hăng hơdôm hơdră pơkă, hơdră bruă, kaih hloh amăng blan 12/2025 khom pơphun pơkra jơlan rơdêh treng anai. Khua dêh čar ta rơkâo kơsem min dong, yap glăi glông jơlan, hơdôm anih graih rơdêh, rơnoh dăp hơdră mơ̆ng rơwang bruă hăng jơlan gah tơpă hloh, giăm hloh tơdah dưi, ƀu kiăng kiăo tui jơlan rơdêh treng hơđăp mơ̆ nao tui jơlan phrâo; pơplih pơkra mrô hăng anih anom pơdŏng graih rơdêh treng lăp djơ̆./.