VOV4.Jarai - Lơ 30/3/2022, ƀơi Ƀirô mă bruă Kơnuk kơna, Khua dêh čar ta ơi Phạm Minh Chính hmâo tŭ jum Khua anih jưh pơ ala kơ dêh čar Mi ƀơi dêh čar Việt Nam Marc Evans Knapper nao lăi pơthâo ƀrô djơ̆ Khua anih jưh pơ ala pơphun rơwang bruă rai mă bruă. Amăng mông tŭ jum, Khua dêh čar ta hơ-ư̆č hmưi Khua anih jưh pơ ala kơ dêh čar Mi dưi hmâo Khua mir sir ơi Joe Biden jao bruă yôm phăn phrâo hăng pơwot glăi Hà Nội mă bruă hăng sa čô Khua anih jưh pơ ala; pơdah pran đăo gơnang hăng bruă apăn phrâo, Khua anih jưh amra gum hơgôp hloh dong kơ bruă gum hrom abih bang kơplah wah dua bôh dêh čar. Khua dêh čar pơsit glăi Mi lĕ sa amăng hơdôm bơnah gum hrom yôm phăn ba jơlan hlâo mơng Việt Nam hăng Việt Nam čang rơmang gum hrom Mi ngă brơi bruă gum hrom abih bang nao dơlăm hloh, ba glăi bôh tơhnal hloh, sit nik hluai tui tơlơi pơpŭ rơngai, dưi pô, pơhlôm đơ đam lŏn ia, hơdră bruă kơđi čar hăng tơlơi pha ra mơng tơdruă. Khua anih jưh pơ ala kơ Mi ƀơi Việt Nam pơdah pran jua mơ-ak dưi pơwot glăi mă bruă ƀơi Việt Nam, pơsit yôm tơlơi pơđĭ kyar kơtang tit mơng Việt Nam amăng djop bruă, biă ñu amăng bruă pơgang, pơgăn klin hăng hơkrŭ glăi bruă bơwih ƀong tơdơi kơ klin ngă./.

Siu H’ Prăk: Pơblang