VOV4.Jarai - Tlam lơ 31/3, ƀơi sang bruă Kơnuk kơna, Khua dêh čar ơi Phạm Minh Chính hơmâo tŭ jum Khua anih jưh Thái Lan ƀơi Việt Nam Nikorndej Balankura rai mă tơngan. Ƀơi mông tŭ jum, Khua dêh čar Phạm Minh Chính lăng yôm biă kơ tơlơi Ngă hrŏm kơtang hloh Việt Nam - Thái Lan hrơi blan rơgao, pơđĭ kyar klă hiam, jai hrơi dlăm hloh amăng djŏp bruă. Khua dêh čar lăi dua boh dêh čar kiăng pơtrut đĭ kơtang hloh tơlơi đăo gơnang nao rai, amăng anun hơmâo bruă ngă tŭ yua bruă bơkơtuai, pơbưp khua mua prong hăng djŏp gưl, djŏp tơlơi phiăn ngă hrŏm dua bơnah, biă ñu lĕ tơlơi phiăn jơnum gưl Kơnuk kơna kơplah wah Kơnuk kơna hăng Jơnum min tum pơƀut lu bruă kơ tơlơi ngă hrŏm dua bơnah. Khua dêh čar kiăng dua bơnah bơlăi nao rai bruă tŭ ư Hră vaccine tơdruă; pok glăi jơlan rơdêh por tui hơđăp, ngă gêh gal brơi bruă tuai hyu ngui, sĭ mơdrô dua bơnah; pơsit Việt Nam amra ngă hrŏm kơjăp hăng Thái Lan đah mơng pơhlôm truh kih thun APEC Thái Lan 2022.

Siu H’Mai: Pơblang