Kiăng pơtrut tui tơlơi ngă hrŏm plah wah Việt Nam hăng OECD jai hrơi sit nik, tŭ yua hloh, Khua dêh čar lăi pơthâo Việt Nam kiăng kơsem min mut hrŏm OECD hăng rơkâo Khua čih pioh git gai hơdôm Anom apăn bruă mơ̆ng OECD pơtô brơi tơlơi thâo rơgơi hơdră ngă bruă, laih anun djru Việt Nam pơđĭ tui tơlơi rơgơi, dưi pơhno, anăp nao ngă tui djơ̆ hăng rơnoh pơkă wai lăng rŏng lŏn tơnah mơ̆ng OECD; djru Việt Nam dưi ngă giong hăng lăi pơthâo bruă bơwih ƀong yôm ngă atur či sem lăng pơkra hơdră đĭ kyar sui thun mơ̆ng Việt Nam.

Khua dêh čar rơkâo OECD dong yua, djru kơ Việt Nam đah mơ̆ng dưi ngă djơ̆ hăng rơnoh pơkă, anăp nap mut hrŏm OECD, mơ̆ng anun mut dlăm hloh amăng tơlơi bơwih ƀong rŏng lŏn tơnah, laih anun gum pơgôp lu hloh kơ jar kmar, yua kơ tơlơi rơngai, ngă hrŏm, đĭ kyar ƀơi rŏng lŏn tơnah.