VOV4.Jarai-Tlam lơ 14/2, ƀơi anom bruă Kơnuk kơna, Khua dêh čar ơi Phạm Minh Chính tŭ jum ơi Alok Kumar Sharma, Khua ding jum Kơnuk kơna Angle, Khua git gai jơnum tal 26 hơdôm bơnah ngă hrom hră pơkôl mơ̆ng Sang gum hơbit djop dêh čar kơ anŏ pơblih ayuh hyiăng lŏn tơnah COP26 hlăk rai čuă jơmư hăng mă bruă ƀơi Việt Nam, kiăng pơtrut pok pơhai ngă tui boh yôm phun jơnum.

Khua dêh čar ơi Phạm Minh Chính tŭ jum ơi Alok Kumar Sharma

Ƀơi mông tŭ jum, Khua dêh čar ơi Phạm Minh Chính mơak tŭ jum Khua ding jum kơnuk kơna Angle ruah Việt Nam ngă anih rai čuă blung a amăng kual ASIA. Jơnum hơmâo pok sa črăn phrâo tơlơi gir run mơ̆ng tar ƀar rŏng lŏn tơnah bong glăi anŏ pơblih ayuh hyiăng, hơmâo tơlơi tŭ ư mơ̆ng jar kmar ngă hrom kiăng pơgăn anŏ sat mơ̆ng djah djâo trun tơl mrô 0 truh tong krah rơnuk thun anai.

Ơi Alok Kumar Sharma lăi pơthâo tơlơi pơblih prong mơ̆ng Việt Nam tơdơi tal rai čuă blan 5 thun 2021, bơni hơ-ơč kơ Việt Nam amăng bruă pơgang klin tŭ yua. Hơdôm dêh čar ngă hrom ăt ƀuh Việt Nam tŭ mă lu boh tơhnal prong pok pơhai tlâ̆o vaccine.

Nay Jek: Pơblang