VOV4.Jarai - Tlam lơ 13/4, ƀơi Ƀirô mă bruă, Khua dêh čar ơi Phạm Minh Chính tŭ jum Khua ding jum pơtom hiăp Canada ƀrô tal ñu rai čuă dêh čar Việt Nam. Amăng mông bưp, Khua dêh čar ơi Phạm Minh Chính pơdah tơlơi hok mơ-ak lơ̆m tơlơi rô nao rai kơplah wah dua bơnah tŏ tui hiam klă hăng sit nik. Khua ding jum pơtom hiăp Canada tŭ ư hăng hơdôm tơlơi rơkâo mơng Khua dêh čar ta ơi Phạm Minh Chính kơ hơdră pơtrut rô nao rai dua bơnah pơ anăp anai, biă mă ñu ƀrô hrơi dua bơnah hơdor glăi 50 thun rô nao rai pơtom hiăp amăng thun 2023.

Khua ding jum pơtom hiăp Canada brơi thâo tal rai čuă anai jing hrŏm hăng bruă kual Ấn Độ Dương - Thái Bình Dương phrâo mơng Canada, tui dêh čar Canada čang rơmang pơtrut dong tơlơi rô nao rai hăng sa, dua boh dehe čar amăng kual, amăng anun hơmâo Việt Nam lĕ yôm hloh. Dua bơnah ăt pơlăi nao rai hơdôm bruă ƀơi kual ia rơsĭ ngŏ, lăi pơtong glăi hơdôm tơlơi yôm pơsir hĭ bruă bơrơsua hăng hơdôm hơdră rơnuk rơnua tui tơlơi phiăn amăng jar kmar hăng kông ước Sang gum hơbit djop dêh čar kơ tơlơi phiăn ia rơsĭ thun 1982 (UNCLOS); ngă tui djop tơlơi pơkôl DOC, anăp nao pơjing COC sit nik, tŭ yua; pơhlôm rơngai, hơđong amăng kual ia rơsĭ, glông rơdêh por amăng kual ia rơsĭ ngŏ, djơ̆ hăng tơlơi dưi mơng djop dêh čar.

Siu Đoan: Pơblang