Ƀơi mông bưp, Khua dêh čar ơi Phạm Minh Chính hok mơ-ak kơ tal nao čuă sit nik Việt Nam blung a mơ̆ng Khua ding jum Manalo; pơsit Việt Nam lêng kơ lăng yôm hăng čang rơmang pơtrut tui tơlơi rô nao rai ngă gŏp hăng Philippines jai hrơi tŭ yua hăng sit nik. Kiăng ba tơlơi rô nao rai dua bơnah jai hrơi pơđĭ kyar kơjăp hloh amăng djŏp mơta bruă.

Amăng anun pơđĭ tui bruă pơbưp khua mua prong hăng djŏp gưl, pơtrut bruă bơwih ƀong sĭ mơdrô, amăng anun hơmâo sĭ mơdrô braih, sem lăng lui hĭ tơlơi ngă tơnap, laih anun djru nao rai pơhlôm hơđong braih apiăng, akŏ pơdong anih sĭ mơdrô hăng tuh pơ alin gêh gal kơ abih bang anom bơwih ƀong; gir hơmâo prăk sĭ mơdrô dua bơnah 10 klai dolar Mi hăng pơtrut ngă hrŏm amăng bruă pơkŏn dong kah hăng bơwih ƀong mrô, bơwih ƀong pơdar nao rai, bơwih ƀong mơtah, apui lơtrik phrâo, pơgang pơplih ayuh hyiăng, bruă ƀơi ia rơsĭ, djru pơđĭ kyar bơwih ƀong ƀơi ia rơsĭ, pơčeh phrâo, pơphun bơwih ƀong.