VOV4.Jarai - Lơ 11/5/2022, ƀrô hrơi Jơnum khua mua pơprong yôm phăn kual ASEAN - Mi, nao čuă hăng mă bruă ƀơi Mi hăng Sang gum hơbit djop dêh čar, ƀơi plơi prong Washington DC, Mi, Khua dêh čar ta ơi Phạm Minh Chính hơmâo tŭ jum Khua ding jum prăk kak Mi Janet Yellen. Amăng mông bưp, Khua dêh čar lăng tơlơi rô nao rai ngă hrŏm djop mơta kơplah wah Việt Nam - Mi, ngă hrŏm bơwih ƀong huă- sĭ mơdrô hăng prăk kak kơplah wah dua bơnah amăng thun blan laih rơgao hơmâo pơđĭ kyar hiam klă.

Khua dêh čar rơkâo Kơnuk kơna hăng Ding jum prăk kak Mi djru hăng ngă hrŏm kjăp dong hăng Việt nam amăng pơđĭ kyar bơwih ƀong huă, pơsir hĭ hơdôm tơlơi lông amăng rŏng lŏn tơnah, amăng anun hơmâo pơplih mă yua apui lơtrik hăng ngă tui tơlơi ƀuăn amăng COP26, ngă hrŏm kiăng pơjing hơdră bơwih ƀong huă amăng kual, hơđong tơlơi rô nao rai sĭ mơdrô hăng pơdŭ pơgiăng nao rai gơnam tam. Khua dêh čar čang rơmang Mi lăi pơthâo tơlơi găn rơgao amăng pơđĭ kyar prăk kak, sit biă ñu čang rơmang chứng khoán, bruă sĭ mơdrô sang dŏ, lŏn mơnai klă hloh, hơđong, tơpă sit pơgôp ngă hơđong amăng bruă bơwih ƀong huă pơhư prong.

Siu Đoan: Pơblang