Khua dêh čar ơi Phạm Minh Chính lăi pơtong UAE lĕ sa amăng hơdôm boh dêh čar ngă hrŏm bơwih ƀong huă prong hloh mơng dêh čar Việt Nam amăng kual Trung Đông. Mah dŏ bưp lu tơlơi tơnap tap yua klin Covid-19 hăng tơlơi rung răng amăng rŏng lŏn tơnah, samơ̆ rơnoh sĭ mơdrô dua bơnah thun 2022 giăm 5 klai đôlar Mi.

Pơ anăp anai, Khua dêh čar rơkâo dua bơnah pơtrut kơtang ngă hrŏm bơwih ƀong huă, sĭ mơdrô, tuh pơ alin, amăng anun pơtrut bơkơtuai Tơlơi pơkôl ngă hrŏm bơwih ƀong huă djop mơta Việt Nam-UAE brơi tañ hloh; rơkâo UAE pok prong sĭ mơdrô gơnam tam pơ Việt Nam. Khua ding jum sĭ mơdrô UAE pơsit tong Việt Nam lĕ dêh čar ngă hrŏm yôm phăn hăng UAE, sit biă ñu amăng pơđĭ kyar sĭ mơdrô hăng kual ASEAN, brơi thâo dua bơnah hơmâo lu tơlơi bơkơnar kiăng djru tơdruă pơđĭ kyar.