VOV4.Jarai - Khua dêh čar ơi Phạm Minh Chính hơmâo tŭ jum Khua ding jum Tơlơi phiăn dêh čar Lao Phayvy Siboualypha ba jơlan Khul khua Ding jum tơlơi phiăn dêh čar Lao rai čuă hăng mă bruă ƀơi Việt Nam. Khua dêh čar lăng yôm boh than hơmâo ngă amăng mông Jơnum kơplah wah dua Ding jum Tơlơi phiăn Việt Nam hăng Lao; đăo gơnang Ding jum Tơlơi phiăn dua boh dêh čar amra pơphun truh kih jơnum ngă lơphet 40 thun ngă hrŏm gah tơlơi phiăn laih anun Jơnum anom bruă tơlơi phiăn hơdôm boh tơring čar hơmâo jơlan guai hrŏm Việt Nam - Lao pok prong tal 5, gum pơgôp brơi tơlơi truh kih mơng thun Gum pơgôp giăng mah Việt Nam - Lao, Lao - Việt Nam thun 2022. Amăng hrơi blan pơ anăp, Khua dêh čar kiăng dua boh dêh čar gum pơgôp, ngă bruă djơ̆ hrŏm hloh đah mơng dưi găn rơgao tơnap tap, tơlơi lông lăng, gir ngă hrŏm kơjăp, pơtrut tui tơlơi rô nao rai ngă giăng mah prong prin anai; Khua dêh čar pơsit dong yua tơlơi ngă hrŏm dua anom bruă tơlơi phiăn, Việt Nam amra djru ba Lao amăng bruă tơlơi phiăn, lăi pơthâo tơlơi thâo rơgơi akŏ pơjing, čih pơkra tơlơi phiăn, akŏ pơdong kơnuk kơna tơlơi phiăn xã hội chủ nghĩa; kiăng dua čô Khua ding jum sem lăng hơdră ngă bruă rơđah, lăp djơ̆, tŭ yua hloh.

Siu H’Mai: Pơblang