VOV4.Jarai - Tlam lơ 13/7, ƀơi ANom bruă Kơnuk kơna, Khua dêh čar ơi Phạm Minh Chính tŭ jum yă Pauline Tamesis. Khua djru bruă mơng Sang gum hơbit djop dêh čar glăk rai mơ-it hră pơsit mơng Khua čih pioh Sang gum hơbit djop dêh čar, pơphun rai mă bruă ƀơi dêh čar Việt Nam. Amăng mông bưp, Khua dêh čar brơi thâo: Việt Nam hơmâo gir run hăng pơgôp prong prin amăng bruă mă mơng Sang gum hơbit djop dêh čar, amăng anun hơmâo bruă mă amăng rơwang ngă Ding kơna ƀu sit nik amăng Khul pơgang rơnuk rơnua Sang gum hơbit djop dêh čar, đĭ tui pran gum pơgôp ling tơhan wai pơgang rơnuk rơnua mơng Sang gum hơbit djop dêh čar. Khua dêh čar ta čang rơmang Sang gum hơbit djop dêh čar amra tŏ tui gum hrŏm hăng djru brơi Việt Nam pơ anăp dong, sit biă ñu amăng bruă ngă tui hơdôm hơnong pơkă pơđĭ kyar hơđong kjăp, hơkrŭ glăi tơdơi kơ abih klin, pơhlôm brơi tơlơi hơdip mơnuih mơnam, djru ngă tui tơlơi ƀuăn amăng wai pơgang ayuh hyiăng. Khua dêh čar pơsit tong Kơnuk kơna Việt Nam amra tŏ tui pơtrut hơdôm bruă ngă hrŏm hăng Sang gum hơbit djop dêh čar hăng ngă gêh gal hloh kiăng djop anom bruă mơng Sang gum hơbit djop dêh čar dưi mă bruă klă hloh tui jơlan hơdră, akŏ bruă ngă hrŏm ƀơi Việt Nam.

Siu Đoan: Pơblang