VOV4.Jarai-Tlam lơ 13/9, ƀơi anom bruă kơnuk kơna, Khua dêh čar ơi Phạm Minh Chính hơmâo tŭ jum bưp Khua git gai pơ ala mơnuih ƀôn sang dêh čar Kur, ơi Samdech Heng Samrin hlăk rai čuă jơmư sit nik Việt Nam. Ƀơi mông tŭ jum, dua čô khua pơdah pran jua hok mơak kơ bruă pơđĭ kyar giăng mah rô nao rai Việt Nam-Kur.

Kơ hơdră anăp nao tơlơi ngă giăng mah hơđong rô nao rai dua bơnah pơ anăp adih, dua čô khua tŭ ư pơphun bưp nao rai lu hloh, pơtruh nao rai tơlơi pơhing djop bruă, kiăng ngă kjăp na nao tơlơi giăng mah kơđi čar đăo kơnang; djop anom bruă tơlơi phiăn hăng gong gai kơnuk kơna dua bơnah ăt pơđĭ tui tơlơi gơgrong ba ngă hrom, djru nao rai ƀơi mông jơnum jar kmar laih anun amăng kual. Khua dêh čar ơi Phạm Minh Chính lăi pơtong Việt Nam dong yua hăng đăo kơnang dêh čar Kur amra gơgrong ba ngă khua kual ASEAN hăng AIPA thun 2022 tŭ yua.

Nay Jek: Pơblang