VOV4.Jarai-Tlam lơ 2/6, ƀơi Sang bruă Kơnuk kơna, Khua dêh čar ơi Phạm Minh Chính hơmâo tŭ jum Khua tơhan Trung tướng ơi Outthakaysone, Kơ-iăng khua ding jum, khua git gai tơhan blah ngă dêh čar Lao hăng grup khua mua ling tơhan dêh čar Lao hlăk ai čuă jơmư dêh čar Việt Nam. Ƀơi mông tŭ jum, Khua dêh čar lăi, Ping gah, Kơnuk kơna, lŏn ia hăng mơnuih ƀôn sang Việt Nam lăng yôm biă mă bruă pơtrut tơlơi ngă giăng mah gru grua mơ̆ng đưm laih anun bruă ngă hrom hlôm bôm kơplah wah Việt Nam hăng Lao, hơmâo hơdôm rơnuk gưl khua mua pơbŭ đĭ laih.

Jơlan hơdră sa hnong mơ̆ng Việt Nam kơtưn pơtrut abih pran jua prong hloh hrom hăng dêh čar Lao pơtrut tơlơi ngă giăng mah tong ten kơplah wah dua bơnah dêh čar jai hrơi dơlăm hloh, tŭ yua hăng hơmâo boh tơhnal amăng djop bruă. Amăng anun, tơlơi ngă hrom gah ling tơhan Việt Nam-Lao ăt jing sa amăng hơdôm tơmeh phun kjăp hloh bruă ngă giăng mah kơ dua bơnah, yua kiăng rơnuk rơnua mơak klă hơđong hăng pơđĭ kyar kơ rĭm boh dêh čar laih anun pơgôp hrom pơgang hơđong amăng kual laih anun ƀơi jar kmar.

Nay Jek: Pơblang