Amăng mông bưp, Khua dêh čar ơi Phạm Minh Chính pơsit tong, Việt Nam lêng kơ lăng yôm tơlơi rô nao rai ngă hrŏm djop mơta hăng Mi, lăng yôm hơdôm tơlơi pơđĭ kyar kơtang amăng tơlơi rô nao rai bơwih ƀong huă-sĭ mơdrô-tuh pơ alin kơplah wah dua bơnah. Khua dêh čar lăi pơtong, Việt Nam pơsit bruă bơwih brơi tơlơi suaih pral, wai pơgang ană mơnuih lĕ bruă yôm phun; rơkâo Abbott pơtrut tuh pơ alin, ngă hrŏm amăng djop mơta bruă mơ̆ Việt Nam glăk đing nao anun lĕ; đing nao ngă hiam drơi jăn, tơlơi suaih pral kơ mơnuih Việt Nam, amăng anun hơmâo bruă bơbuă drơi jăn; pơđĭ kyar bruă pơkra ia jrao, boh thâo sinh học…

Khua grup Abbott pơpŭ bơni Việt Nam hơmâo ba jơlan hlâo amăng bruă bơbuă hiam drơi jăn, hăng tơlơi găn rơgao yôm mơ̆ lu dêh čar amra hrăm tui. Abbott ƀuăn tuh pơ alin, bơwih ƀong sui thun ƀơi Việt Nam hăng amra ngă hrŏm kjăp hăng Việt Nam amăng djop mơta bruă  hơmâo Khua dêh čar črâo brơi.