Khua dêh čar ơi Phạm Minh Chính lăi pơtong, Việt Nam lăng yôm biă mă tơlơi ngă giăng mah hlom bom Việt Nam hăng Mi, bơni kơ dêh čar Mi kơtưn ngă hrŏm Việt Nam, pơpŭ kơ hơdră apăn bruă git gai kơđi čar phara ba dêh čar hlăk ngă tui laih anun dong yua Việt Nam “kơtang, rơngai, hrưn đĭ pô hăng pơdrong sah”. Pơ anăp anai, Khua dêh čar rơkâo dua boh dêh čar ăt pơtrut ngă giăng mah brơi grup khua mua čuă jơmư nao rai, pơblih grup khua mua pơ ala mơnuih ƀôn sang hyu čuă jơmư, laih anun mơ-it hiăp jak iâu grup khua mua pơ ala thun hlăk ai mơ̆ng dêh čar Mi rai jơnum hrŏm khua mua pơ ala mơnuih ƀôn sang thun hlăk ai lok 9 yua anom bruă khua pơ ala mơnuih ƀôn sang dêh čar Việt Nam pơphun.

Khua dêh čar rơkâo, dua boh dêh čar pơtrut ngă hrŏm amăng bruă sĭ mơdrô, bơwih ƀong huă, tuh pơ alin, boh thâo ia rơgơi, pơtô hrăm, pơčeh phrâo amăng bruă mă pơkra čip pơkĕ điện tử, mă yua ia rơgơi mrô, pơblih yua ia săng hăng apui lơtrik rơgoh, pơtrut pơđĭ kyar hăng lu mơta gơnam sĭ mơdrô laih anun bŏng glăi anŏ pơblih ayuh hyiăng lŏn tơnah.