VOV4.Jarai-Tlam lơ 31/5, ƀơi sang bruă kơnuk kơna, Khua dêh čar ơi Phạm Minh Chính hơmâo tŭ jum ơi Pascal Soriot, Khua phun sang bruă group AstraZeneca hlăk rai čuă hăng mă bruă ƀơi Việt Nam tui hăng tơlơi jak iâu mơ̆ng Khua dêh čar. Ƀơi mông tŭ jum, Khua dêh čar ơi Phạm Minh Chính lăng yôm biă mă tơlơi gơgrong ba hăng djru ia jrao pơgang mơ̆ng Group AstraZeneca gir run pơgăn glăi hăng klin Covid 19 amăng rŏng lŏn tơnah hăng ƀơi Việt Nam.

Khua dêh čar bơni kơ bruă ngă hrom tong ten hăng tŭ yua mơ̆ng anom bruă AstraZeneca hăng Việt Nam hrơi blan rơgao, biă mă ñu ơi Pascal Soriot hơmâo git gai anom bruă AstraZeneca djru giăm 30 klăk gêt ia jrao vaccine pơgang Covid 19 kơ Việt Nam thun 2021. Hok mơak brơi pok prong tuh pơ alin ngă hrom pơkra ia jrao ƀơi Việt Nam hăng rơnoh prăk 90 klăk dolar, khua dêh čar bơni kơ Ding jum ia jrao hăng kông ty AstraZeneca Việt Nam hlăk pơčrông sai kĭ pơkôl ngă hrom dua bơnah. Anai lĕ atur pioh kơ Sang bruă group AstraZeneca ngă hrom Việt Nam sui thun, djơ̆ hăng tơlơi ƀuăn ngă hrom Việt Nam pơđĭ kyar hơđong kjăp.

Nay Jek: Pơblang