VOV4.Jarai - Tlam lơ 2/8, Khua dêh čar ơi Phạm Minh Chính tŭ jum Khua sang anih jưh pơ ala dêh čar Angle Gareth Ward rai bưp, mă tơngan ƀrô hrơi ñu pơđut thun mă bruă ƀơi dêh čar Việt Nam. Amăng mông bưp, Khua dêh čar ơi Phạm Minh Chính lăng yôm hơdôm tơlơi gum pơgôp  mơng Khua sang anih jưh pơ ala dêh čar Angle amăng thun blan laih rơgao hơmâo pơgôp pơtrut tơlơi rô nao rai ngă hrŏm kơplah wah Việt Nam-Angle jai hrơi pơđĭ kyar, tŭ yua, sit nik amăng djop mơta bruă hăng hơdôm bruă pơtom hiăp, pơtrut pơbưp nao rai mơnuih ƀon sang dua bơnah. Amăng mông bưp, dua bơnah hơmâo pơlăi nao rai hơdôm bruă amăng jar kmar hăng amăng kual dua bơnah đing nao. Khua sang anih jưh pơ ala dêh čar Angle dong yua tơlơi pơmĭn mơng ASEAN hăng Việt Nam amăng bruă pơhlôm rơnuk rơnua, rơngai hăng rơngĭt adai, kual ia rơsĭ hăng pơsir hĭ hơdôm kơđi amăng kual ia rơsĭ Ngŏ hăng hơdôm hơdră rơnuk rơnua tui tơlơi phiăn, sit biă ñu lĕ Tơlơi pơkôl pơkă mơng Sang gum hơbit djop dêh čar hăng Công ước Sang gum hơbit djop dêh čar kơ tơlơi phiăn kual ia rơsĭ thun 1982.

Siu Đoan: Pơblang