Amăng mông tŭ jum, Khua dêh čar ơi Phạm Minh Chính pơtŏng sit, Việt Nam pơpŭ na nao tơlơi rô nao rai giăng mah mơ̆ng hlâo hăng gum hrŏm lu mơta bruă hăng Belarus, hrŏm hăng anun pơdah pran jua djơ̆ pran ƀơi anăp hơdôm pơđĭ kyar klă amăng tơlơi rô nao rai Việt Nam hăng Belarus hơdôm hrơi rơgao, biă ñu gah bruă kơđi čar – pơtom hiăp.

Kiăng mă yua ba glăi bôh tơhnal gal hăng pran kơtang kơplah wah dua bơnah, Khua dêh čar ơi Phạm Minh Chính rơkâo dua bơnah kơtưn bơkơtuai nao rai grŭp, biă ñu gưl dlông, gum hrŏm amăng hơdôm mông bơkơtuai lu bơnah; rơkâo dua bơnah gir run pơtrut tơlơi rô nao rai bơwih ƀong – sĭ mdrô dua bơnah ră anai dô̆ ƀơi rơnoh ƀiă biă bơhmu hăng anô̆ gal hăng pran kơtang, ngă gal brơi pioh anom bơwih ƀong dua bơnah kơtưn gum hrŏm tuh pơplai; djă pioh bôh tơhnal hơdră pơkă Jơnum min pơlir Gong gai hăng čih pơkra kơčăo bruă mă rơđah hăng hơdră ngă lăp djơ̆ hăng ba glăi bôh tơhnal hloh dong./.