Anai lĕ group bơwih ƀong sĭ mơdrô prong gah bruă pơkra ming pơčeh rai ia rơgơi tơlơi pơhing ba akŏ dêh čar India, hăng rơnoh prăk truh 70 klai USD, hơmâo abih bang 320.000 čô mơnuih mă bruă laih anun prăk pơhrui glăi thun 2023 truh 18 klai USD. Khua dêh čar ơi Phạm Minh Chính pơdah pran jua bơni biă mă, anŏ prong, tơlơi gơgrong mă bruă hăng kơnuih hing ang mơ̆ng Group Infosys, ăt kah hăng tơlơi gơgrong ba mơ̆ng ơi Narayana Murthy hăng anih anom sĭ mơdrô gơnam yua boh thâo ia rơgơi tơlơi pơhing mơ̆ng dêh čar India lăi pha hăng ƀơi rŏng lŏn tơnah hnun mơ̆n.

Khua dêh čar ơi Phạm Minh Chính lăng yôm mông jơnum bơkơtuai, bơ ră ruai ba glăi boh tŭ yua mơ̆ng ơi Narayana Murthy hăng hơdôm kông ty, anom bruă, mơnuih rơgơi kơhnâo hăng čơđai sang hră gưl prong Việt Nam. Hăng atur tơlơi ngă giăng mah pŭ ƀăn hiam klă hăng dêh čar India, Việt Nam bơni laih anun hok mơak, amra ngă gêh găl amuñ laih anun čang rơmang lu group bơwih ƀong sĭ mơdrô pơprong mơ̆ng dêh čar India ngă hrŏm tuh pơ alin sui thun ƀơi Việt Nam amăng bruă mă bơwih ƀong huă mrô, boh thâo ia rơgơi tơlơi pơhing, boh thâo ia rơgơi tuh tia pơkra ming mơ̆ng dlô akŏ pơčeh phrâo pơkra rai hrĕ pơkĕ apui lơtrik amăng măi mok.