Ƀơi mông jơnum, ƀing ding kơna amăng kơnuk kơna sem lăng hăng pơgôp hiăp, hră pơtrun hăng 11 mơta bruă amăng 6 kơčăo bruă tơlơi phiăn kah hăng: Pơhlôm pơgang adai rơngit mơnuih ƀôn sang; Wai lăng, mă yua phao kơtuang, boh pơtuh hăng gơnam yua kah hăng phao kơtuang čih pơhrua glăi; Gơnam gru hiam đưm čih pơhrua glăi; čih pơkra glăi hăng pơhrua hơdôm mơta tơlơi amăng Tơlơi phiăn pơkă hnong hăng anŏ djơ̆ găl mơneč bruă; čih pơkra phrâo, pơhrua nao hơdôm mơta tơlơi phiăn Sĭ ia jrao. Laih anun sem lăng rơkâo čih pơkra tơlơi phiăn: Grat, gưl akă grat pơtom hiăp; Anom bruă rơdêh por čih pơkra glăi; jơlan rơdêh treng čih pơkra glăi; Gŭ lŏn hăng kông ngăn lŏn tơnah; Bruă tuh tia pơkra ming ia rơgơi mrô; laih anun rơkâo hơdră čih pơkra tơlơi phiăn, hră pơtrun kơ thun 2025, pơkra glăi Hơdră čih tơlơi phiăn, hră pơtrun thun 2024.

Tui hăng Khua dêh čar, 11 mơta boh yôm hơmâo sem lăng pơgôp hiăp, pơtrun ngă tui amăng mông jơnum kơnuk kơna blan 2/2024 lêng kơ boh yôm phun prong soh, tơnap yap, gleh glar, anŏ bơbeč prong truh bruă akŏ pơdong čih pơkra tơlơi phiăn, ngă giong, pơjing phrâo, pơrơhai djop mơta pran kơtang pioh pơtrut pơđĭ kyar. Khua dêh čar pơtrun hiăp kơ djop ding jum, anom bruă gah kơnuk kơna wai lăng khom pơđĭ tui pran jua, bruă mă, khom git gai ƀơi anăp mơta, ba rai tơlơi ngă, hơdră man pơphô kiăng čih pơkra tơlơi phiăn, djơ̆ hnong pơkă, tŭ yua, pơtum pran jua mơnuih mơnam, ƀing ngă bruă hrŏm čih pơkra tơlơi phiăn.