Khua dêh čar ơi Phạm Minh Chính brơi thâo, Việt Nam lăng yôm hăng kiăng ngă kjăp tui bruă rô nao rai hăng dêh čar Đức amăng djop bruă mă hăng lăng yôm boh tơhnal bruă sĭ mơdrô mơ̆ng anom bruă Siemens ƀơi rŏng lŏn tơnah lăi hrŏm hăng ƀơi Việt Nam hnun mơ̆n, biă mă ñu hơdôm kơčăo bruă pơkĕ yua apui lơtrik hăng bruă tuh tia pơkra ming măi mok pơsơi pơsă, bruă čuk pơkra jơlan, pơdong sang, pơkra măi ƀong pil hơdjă hăng pơjing măi mă bruă hơjăn, pơđĭ tui bruă pơkra jơlan rơdêh treng....

Kiăng pok pơhai ngă tui djop tơlơi pơkôl mơ̆ng dua bơnah khua mua dêh čar, Khua dêh čar ta rơkâo kơ anom bruă Siemens pơtrut tui bruă ngă hrŏm hăng Việt Nam amăng bruă pơkra ming gơnam yua rơgơi, pơtrut pơčeh phrâo pơkra ming; djru nao rai ngă hrŏm pơblih yua gơnam hơdjă, ayuh hyiăng mơtah mơda, pơđĭ kyar bruă pơkra ming ia săng ia jâo, pil apui lơtrik hơdjă, pơblih yua mrô, man pơdong sang bruă kơsem min hăng pơđĭ kyar anom bruă Siemens ƀơi Việt Nam.

Siemens lĕ group bơwih ƀong prong mơ̆ng dêh čar Đức, hơmâo lu tơlơi thâo thăi, găn rơgao amăng bruă tuh tia pơkra ming, bruă mă wai lăng tơlơi suaih pral, jơlan glông nao rai hăng pơkra ming jơlan glông, sang dŏ rơgơi. Group anai hơmâo 320.000 čô mơnuih mă bruă hăng rơnoh prăk pơhrui glăi 78 klai euro amăng thun 2023.