VOV4.Jarai - Khua dêh čar ta ơi Phạm Minh Chính lơ 6/3, nao pơhmư̆ mông Jơnum pơtrut pơđĭ kyar bruă đang hmua Kual lŏn dăo ia krông Cửu Long ngă juăt hăng pơplih ayuh hyiăng ƀơi tơring čar Kiên Giang. Jơlan hơdră yua kơ Ding jum đang hmua hăng pơđĭ kyar ƀôn lan dêh čar hăng 13 bôh tơring čar, ƀôn prong Kual lŏn dăo ia krông Cửu Long gum hrom pơphun. Bruă jơnum pơtrut pơđĭ kyar bruă đang hmua kơjăp ƀơi kual juăt hăng ayuh hyiăng pơplih jing tơlơi yôm phăn, kiăng pơplih phrâo, pơtrut kơtang hloh dong bruă pok pơhai ngă tui Tơlơi pơtrun pơsit Jơnum tal 13 mơng Ping gah hăng hơdôm Tơlơi pơtrun pơsit, hơdră pơtrun, hơdră bruă prong mơng Ping gah, Kơnuk kơna, Gong gai dêh čar kơ pơđĭ kyar bruă đang hmua. Tui tơhnal pơkă pơđĭ kyar Kual lŏn dăo ia krông Cửu Long truh thun 2025 hmâo rơnoh đĭ kyar GDP gah đang hmua hmâo rơbêh kơ 3% sa thun. Pơhrui glăi hơnong ñu sa akô̆ mơnuih ƀơi kual plơi pla đĭ ƀiă biă mă ñu 2 wot bơhmu hăng thun 2018. Pơhiăp amăng mông jơnum, Khua dêh čar ta ơi Phạm Minh Chính črâo rơđah, anih anom, bruă mă mơng Kual lŏn dăo ia krông Cửu Long yôm phăn biă wot bruă kơđi čar, bơwih ƀong, mơnuih mơnam, rơnuk rơnua plơi pla lŏn ia, amăng sĭ mơdrô hăng hơdôm bôh dêh čar kual ASEAN hăng Kual ia krông Mê Kông. Khua dêh čar rơkâo, mă yua anô̆ gal kiăng pơđĭ kyar bruă đang hmua dlai klô ba glăi bôh tơhnal prong, plơi pla rơnuk phrâo, mơnuih ngă đang hmua tui hơdră phrâo; pơsit mơnuih ngă đang hmua lĕ phun, plơi pla jing phun gơgrong, đang ngă jing pran pơtrut; gơgrong hlâo ngă juăt hăng pơplih ayuh hyiăng, khom nao hrom kơjăp hăng bruă đang hmua, măi mok, sĭ kơdrô. Bruă mă mok hăng sĭ mơdrô khom jing pran gơgrong pơđĭ kyar bruă đang hmua kiăng ba glăi nua gơnam yôm hloh./.

Siu H’ Prăk: Pơblang