VOV4.Jarai - Tlam lơ 12/1, Khua dêh čar ơi Phạm Minh Chính git gai jơnum hăng hơdôm ding jum, gơnong bruă kơ bruă pơgăn hưp ƀong kông ngăn amăng Kơnuk kơna hăng gong gai ƀon lan. Amăng mông jơnum, Khua dêh čar ơi Phạm Minh Chính hơmâo lăi nao tong ten hơdôm bruă aka ƀu klă amăng pơgăn hưp ƀong kông ngăn, kah hăng sa, dua ding jum, anom bruă, ƀon lan ăt aka khut khăt amăng bruă pơgăn hưp ƀong kông ngăn, ba truh bruă ngă soh prong anun lĕ bruă ngă soh mơng kông ti Việt Á, ƀudah sa, dua bruă bơdjơ̆ nao bruă man pơdong, sĭ lŏn mơnai amăng hơdôm thun laih rơgao.

Kơ bruă mă amăng thun 2022, Khua dêh čar rơkâo kiăng kơ kiăo tui tơlơi git gai mơng Ping gah, sit biă ñu tơlơi pơsit mơng Jơnum hăng tơlơi črâo ba mơng Khul git gai, hơdôm bruă mơ̆ Jơnum pơphô bruă bruă đơ đam dêh čar pok pơhai tui bruă mă mơng Kơnuk kơna, hơdôm anom bruă Kơnuk kơna hăng gong gai ƀon lan; kơtưn amăng pel ĕp, gơgrong dong mơng ƀing khua mua. Khua dêh čar rơkâo, tŏ tui pơtrut pel ĕp, ƀom kiơng, pơsir hĭ hơdôm tơlơi ngă soh kar hăng ƀơi kông ti Việt Á djơ̆ hăng tơlơi pơkă amăng tơlơi phiăn.

Siu Đoan: Pơblang