VOV4.Jarai - Yang hrơi dŏng lơ 29/8, ƀơi ƀirô mă bruă Kơnuk kơna, Khua dêh čar ta ơi Phạm Minh Chính tŭ jum ơi Alok Sharma, Khua Ding jum, Khua COP26 hăng Grŭp hyu mă bruă mơng dêh čar Anglê čuă hăng mă bruă ƀơi Việt Nam.

Khua dêh čar ơi Phạm Minh Chính tŭ jum ơi Alok Sharma, Khua Ding jum, Khua COP26

Amăng mông tŭ jum, dua bơnah gum hrom pơsit tơlơi pơplih ayuh hyiăng jai hrơi jai jing tơnap hloh, tơnap him lăng hăng pơkă lăng hlâo amăng đơ đam rŏng lŏn tơnah, yua anun, khom hmâo pran jua gum hrom hơbit jar kơmar hăng hơdră ngă juăt đơ đam rŏng lŏn tơnah kiăng bŏng glăi hăng pơplih ayuh hyiăng. Hăng pran jua pok pơhai khop hơdôm tơlơi pơkôl ƀơi COP26, Việt Nam hmâo pơsit Bruă mơng lŏn ia kơ Tơlơi pơplih ayuh hyiăng rơwang truh kơ thun 2050; Jơlan hơdră mă bruă pơplih apui yua hơdjă; Kơčăo bruă ngă kơ đĭ tui anô̆ hơdjă rơwang 2021-2030... Khua dêh čar ta rơkâo dêh čar Anglê hăng hơdôm bơnah gum hrom pơđĭ kyar lom bơkơtuai pơdŏng bruă gum hrom pơplih apui yua, ngă giong hơdră pơkă hăng lăi pơthâo tơlơi găn rơgao./.

Siu H’ Prăk: Pơblang