VOV4.Jarai - Tlam tom brơi (10/10), Khua dêh čar phrâo hơmâo kông điêng mơ-it Khua Jơnum min mơnuih ƀon sang hơdôm tơring čar, ƀôn prong ƀơi kual tong krah; hơdôm ding jum, gơnong bruă bơdjơ̆ nao, hơdôm anom bruă pôr pơhing gơnong glông, ƀon lan, Khul git gai dêh čar amăng pơhlôm hlâo ayuh hyiăng pơplih sat hăng Jơnum min dêh čar bong glăi hơdôm tơlơi truh sat, hơjan kơthel hăng djru mơnuih bưp tơlơi truh sat lơ̆m hơmâo hơjan kơthel. Amăng kông điêng lăi rơđah: Yua bơbeč mơng ayuh hyiăng rơ-ơ̆, kual Tong krah amra ƀuh hơjan dong pơ anăp anai, amra ngă ia ling dăo ƀơi hơdôm kual dơnung, ngă lŏn tơhlŏm, ia kor ƀơi kual čư̆ siăng ngă răm jơlan, bơdjơ̆ nao bruă bơwih ƀong huă kơ mơnuih ƀon sang.

Hơjan hlim ngă ia ling dăo kơtang ƀơi Phú Yên

Khua dêh čar git gai Jơnum min mơnuih ƀon sang hơdôm tơring čar, ƀôn prong amăng kual Tong krah pơphun kiăo tui lăng na nao hơjan hlim, pel ĕp, ba đuăi mơnuih ƀon sang mơng hơdôm kual hŭi rơhyưt, kual ia ling dăo, ia kor, anăm brơi ngă djai mơnuih; hyu pơtô pơblang, pơtrut pơsur, črâo brơi mơnuih ƀon sang ngă tui hơdôm hơdră pơhlôm rơnuk rơnua, plai ƀiă răm rai lơ̆m ia ling dăo; gơgrong pơhlôm mơnong ƀong huă, gơnam yua brơi mơnuih ƀon sang ƀơi hơdôm kual hŭi rơhyưt, anih ia guang dar yua ia dăo, lŏn tơhlŏm, amra djru brơi hơdôm boh sang anŏ rơmŏn rơpa.

VOV/Siu Đoan: Pơblang