5 blan rơgao, tơlơi bơwih ƀong huă pok prong ƀơi Việt Nam pơhlôm hơđong, prăk trun nua hơmâo wai lăng, pơhlôm bơkơnar djop bơnah; hnưh đôm mơnuih mơnam, hnưh kơnuk kơna, hnưh đôm tač rơngiao pơhlôm tui tơlơi pơkă; lu mrô jŭ yap amăng jar kmar pơhlôm đĭ hăng đăo lăng hlâo GDP mơng Việt Nam thun 2024 dưm dưm rơbêh 6%. Đĭ pơhiăp pơđut mông jơnum, Khua dêh čar ơi Phạm Minh Chính lăi nao hơdôm tơlơi dưi, tơlơi gal, tơlơi lông hăng brơi thâo tơnap tap lu ƀiă anŏ gal, samơ̆ hăng tơlơi gir run ngă pơgiong bruă jao pơđĭ kyar bơwih ƀong huă-mơnuih mơnam thun 2024.

Khua dêh čar rơkâo djop ding jum, gơnong bruă tŏ tui git gai wai lăng hơdră yua prăk kak brơi hơdeč hmar, lăp djơ̆, tŭ yua; gum hrŏm ha amăng plĕ, lăp djơ̆, kjăp phik hăng hơdră yua prăk kak pok prong djơ̆ hloh, tơpă sit; ngă gêh gal brơi anom bơwih ƀong sĭ mơdrô hăng mơnuih ƀôn sang dưi čan prăk hăng kmlai pơhrŏ gap ƀrô; gir run pok pơhai hơdôm hơdră hơđong nua sĭ mơdrô, prap lui pơhlôm brơi djop gơnam sĭ mơdrô, anăm brơi kơƀah gơnam hăng hơdôm tơlơi bơwih bơwang brơi mơnuih ƀôn sang.