VOV4.Jarai - Lơ 3/6, Khua dêh čar ta hơmâo kông điêng kơ bruă ngă tui tơlơi pơkă amăng pơgang, pơgăn anŏ sat mơng tơpai ƀier. Kông điêng mơng Khua dêh čar lăi rơđah, mơng akŏ thun truh ră anai, ƀuh lu rơdêh pơjrŏm ngă rơka rơkač, djai mơnuih mơ̆ ba truh tơlơi anai lĕ yua mơnuih mơñum tơpai ƀier mơgăt rơdêh amăng jơlan glông, sa, dua mơnuih apăn bruă, mơnuih mă bruă amăng anom bruă kơnuk kơna ăt ƀuh mơñum tơpai ƀier mơn lơ̆m mơgăt rơdêh amăng jơlan glông, sit biă ñu bruă pơjrŏm rơdêh amăng mơmŏt mlăm lơ 2/6/2022 ƀơi tơring čar Bắc Giang ngă 3 čô mơnuih djai. Kiăng kơ plai ƀiă ƀuh rơdêh pơjrŏm amăng jơlan glông bơdjơ̆ nao mơnuih mơgăt rơdêh mơñum tơpai ƀier, Khua dêh čar ta rơkâo djop ding jum, gơnong bruă, anom bruă, Jơnum min djop djuai ania mơnuih mơnam Việt Nam, djop khul grup kơđi čar - mơnuih mơnam, Jơnum min mơnuih ƀon sang hơdôm tơring čar, ƀôn prong hăng hơdôm anom bruă bơdjơ̆ nao ngă tui khut khăt tơlơi phăn pơgang, pơgăn anŏ sat mơng tơpai ƀier. Rơkâo ƀing apăn bruă, kông nhơn, mơnuih mă bruă amăng djop anih anom, ƀing čơđai sang hră ngă tui hơdôm tơlơi pơkă yua tơpai ƀier; ba gru ngă tui tơlơi pơkă, tơdah mơñum tơpai ƀier anăm mơgăt rơdêh; hơmâo hơdră pơsir khut khăt hăng ƀing mơnuih ngă soh.

Siu Đoan: Pơblang