VOV4.Jarai - Lơ 6/2, Khua dêh čar ơi Phạm Minh Chính hăng grŭp hyu mă bruă mơng Kơnuk kơna hmâo pel ĕp anih anom, pơtrut pơsur mơnuih mă bruă pơdŏng tơdron dŭ pơgiăng gơnam tam tơdron rơdêh por Jar kơmar Long Thành. Rơwang bruă pơdŏng tơdron dŭ pơgiăng gơnam tam tơdron rơdêh por Jar kơmar Long Thành tal 1 dưi hmâo Khua dêh čar ta pơsit tal sa amăng lơ 1/1/2020, ngă tui mơng thun 2020-2025. Pel ĕp rơwang bruă, Khua dêh čar ơi Phạm Minh Chính dô̆ pơngot, truh ră anai lu bruă ăt akă ngă tui kơjăp mơn. Tui hăng Khua dêh čar, tơlơi pơmin, hơdră pơphun, mă bruă kah hăng ră anai akă ƀu hơđong ôh. Yua anun, hơdôm ding jum, gơnong bruă, anom bruă khom gum hrom kơjăp, pơplih phrâo hơdră ngă; lăng tui anih anom man pơdŏng, khăp kơ rơwang bruă, khăp kơ ring bruă, anom bruă kah hăng ană bă pô anun kah mơng bơwih brơi, dưi pơtrut brơi rơwang bruă. “Rơkâo hơdôm ding jum, gơnong bruă, anom bruă črông lô rơđah bruă mă, bruă gơgrong; hlơi dưi ngă lĕ pơsit pran jua, run pran ngă tui, hlơi ƀu dưi ngă lĕ dŏng ha bơnah pioh pô pơkon ngă”. Khua dêh čar rơkâo, hơdôm ƀirô anom bruă đing nao bơkơtuai ĕp tơbiă jơlan pơsir rơđah rim hrơi blan, rim akô̆ bruă./.

Siu H’ Prăk: Pơblang