Anai lĕ tal 4 Khua dêh čar nao pel ĕp, pơtrut pơsur man pơkra tơdron rơdêh por jar kmar Long Thành amăng rơbêh 2 thun rơgao, tơlơi anai brơi ƀuh tơlơi đing nao biă mă mơng Ping gah, Kơnuk kơna hăng ring bruă anai. Amăng mông mă bruă ƀơi anih man pơkra, Khua dêh čar ơi Phạm Minh Chính lăi rơđah, anai lĕ ring bruă kơđŏm glăi bruă mă amăng rơwang jơnum Ping gah tal XIII.

Yua anun, Khua dêh čar rơkâo tañ man pơkra giong hlâo hrơi pơkă hlâo anun, hăng hơnong pơkă truh lơ 31/12/2025 kiăng man pơgiong ring bruă yôm phun anai pioh čơkă Jơnum Ping gah đơ đam dêh čar tal XIV, hơdor glăi 80 thun akŏ pơjing kơnuk kơna, 50 thun pơklaih rơngai kual Dơnung, pơlir hơbit lŏn ia ta. Khua dêh čar rơkâo Ding jum wai lăng jơlan glông ječ ameč lăi pơthâo kơ anom bruă bơdjơ̆ nao tuh pơ alin man pơkra glông jơlan plĕ trun tal 2, Kơ-iăng khua dêh čar ơi Lê Thành Long git gai bruă lăi pơthâo tơlơi rơkâo pơhrua boh tơhnal anai amăng jơlan hơdră jơnum lok 8, Khua pơ ala mơnuih ƀôn sang dêh čar tal XV.