Hơdôm hrơi rơgao, ƀơi sa dua anih anom kual Dơnung dêh čar hăng kual Dap Kơdư hmâo laih hơjan prong, lŏn tơhroh, ia ling dăo ƀơi sa dua bit anih, bơbeč truh prong jơlan nao rai hăng tơlơi hơdip mơda mơnuih ƀôn sang; biă ñu ƀơi jơlan mrô 20 črăn găn anih čun čue Bảo Lộc (tơring čar Lâm Đồng), hmâo tơlơi lŏn tơhroh ngă 3 čô tơhan polih wai lăng ƀơi jơlan nao rai hăng sa čô mơnuih ƀôn sang lŏn dor hĭ. Khua dêh čar ta mơ-ĭt tơlơi tơña bla, rơngôt hrom dơlăm hloh truh mơnuih amăng sang anô̆ pô hmâo tơlơi truh. Khua dêh čar rơkâo Grŭp črâo ba pơgang, pơgăn ayuh hyiăng ƀu klă ngă hăng Jơnum min bŏng glăi hăng tơlơi truh ayuh hyiăng ƀu klă ngă hăng hyu ĕp mơnuih hmâo tơlơi truh dêh čar ta, ƀing Khua ding jum, Khua Jơnum min mơnuih ƀôn sang hơdôm tơring čar gơgrong hlâo črâo ba, pok pơhai khut khăt, hmao tlôn, ba glăi bôh tơhnal bruă pơgang, pơgăng, pơsir anô̆ răm rai, pơhlôm tơlơi hơdip hăng kông ngăn mơ̆ng mơnuih ƀôn sang.

Truh giăm 11 mông mlăm lơ 30/7, anom bruă bơdjơ̆ nao tơring čar Lâm Đồng hơmâo ĕp ƀuh laih mơnuih lŏn dor lơm lŏn tơhlŏm ƀơi jơlan čun čoe Bảo Lộc. Lơm anun 4 čô mơnuih lŏn dor lơ̆m lŏn tơhlŏm ƀơi jơlan čun čoe Bảo Lộc hơmâo anom bruă bơdjơ̆ nao tơring čar Lâm Đồng ĕp ƀuh laih. Yua hơjan amăng hơdôm hrơi ngă lu anih lŏn tơhlŏm rok jơlan čun čoe Bảo Lộc hăng rok jơlan mrô 20. Amăng 2 mông 30 mơnit tlam, lơ̆m glăk dŏ mă bruă kiăng črâo brơi jơlan rơdêh nao rai hăng djru rơmet hĭ hơdôm anih lŏn tơhlŏm kiăng rơdêh dưi găn nao rai, tô̆ tơnô̆ lŏn tơhlŏm ngă 3 čô tơhan pôlih wai lăng jơlan glông hăng 1 čô mơnuih ƀon sang lŏn dor. Tơdơi kơ hơmâo tơlơi truh sat, khua mua tơring čar Lâm Đồng hơmâo nao tơl anih kiăng git gai hơdôm anom bruă bơdjơ̆ nao ba nao rơbêh 300 čô mơnuih hrŏm hăng rơdêh, măi mok klơi pơdŭ đuăi lŏn hăng ĕp mơnuih lŏn dor.

Ƀơi tơring glông Ea Súp hăng tơring glông Lak mơ̆ng tơring čar Dak Lak, hơdôm hrơi rơgao ăt hmâo hơjan prong sui mơn ngă ia ling dăo lu hmua pơdai, đang phun pla mơ̆ng mơnuih ƀôn sang hăng lu jơlan nao rai ƀu thâo nao rai. Rơđah biă ñu ƀơi tơring glông Lak, hơjan ia ling dăo rơbêh kơ 750 ektar hmua pơdai mơ̆ng lu sang anô̆ mơnuih ƀôn sang ƀơi hơdôm bôh să Buôn Tría, Buôn Triết, Dak Liêng hăng sa dua bôh să, tơring kual.

Amăng anun să Buôn Triết ia ling dăo kơtang hloh hăng rơbêh kơ 320 ektar, să Dak Liêng lĕ 268 ektar, să Buôn Tría lĕ 106 ektar, dô̆ glăi lĕ să Yang Tao, Bông Krang hăng tơring kual Liên Sơn. Bơ̆ ƀơi tơring glông Ea Sŭp, hơjan prong sui hrơi rơgao ăt ngă mơn lu črăn jơlan amăng plơi, să ƀơi hơdôm bôh să Ea Lê, Ea Rôk, Ea Bung... ia ling dăo, lu hmua pơdai, đang phun pla ia lip. Gong gai hăng gơnong bruă gơgrong gah tơlơi anai ƀơi hơdôm tơring glông ƀơi Dak Lak hmâo gơgrong hlâo pok pơhai hơdôm bruă bŏng glăi hơjan ia ling dăo./.