Tui hăng tơlơi lăi pơthâo glăi, truh ră anai, Ding jum apăn bruă gong gai dêh čar hmâo ngă giong laih tơlơi lăi pơthâo glăi klah čun Tơlơi pơtrun pơsit 18 mơ̆ng dêh čar; Akô̆ bruă pơmut hrŏm, sa jua, pơplih bruă apăn, bruă jao, glông jơlan mă bruă hăng hơdôm hră pơ-ar bơdjơ̆ nao, hrŏm hăng akô̆ bruă pơđut bruă mă Grŭp mă bruă Ping gah, pơjing Ping gah Gong gai dêh čar, Ping gah Ding jum, ƀirô dưm kơnar hăng ding jum, ƀirô gah Gong gai dêh čar. Hơdôm khul tơdơi kơ dưm dăp, pơmut hrŏm hrŏ trun mơ̆ng 35% truh kơ 40% akô̆ phun: hơdôm khul grŭp dô̆ glăi dưm dăp amăng lăm lĕ hrŏ trun ƀiă biă ñu 15%.

Phun ñu lui hĭ hơdôm Anom bruă hăng hơdôm khul grŭp dưm kơnar hăng Anom bruă; yak blung a pơkă hlâo hrŏ trun 500 bôh anom gah Ding jum, hơdôm anom bruă. Pơhiăp amăng mông jơnum, Khua dêh čar ơi Phạm Minh Chính lăi rơđah, bruă dưm dăp, pơpha bruă mă lăp djơ̆ hăng pơphun bruă mă khom ngă hiưm hơpă rơbô̆t, mă bruă tŭ yua, ba glăi bôh tơhnal nao hrŏm hăng hơdră pơkă glăi, pơđĭ dlông bôh thâo mơnuih apăn bruă, mơnuih mă bruă čar. Lơm ngă rơbô̆t glông jơlan mă bruă khom pơdŏng, dăp hơdră pơkă hơdră bruă sa jơlan, hmâo tơhnal tŭ mă hơdôm hơdră bruă mơ̆ng hlâo truh ră anai. Biă ñu, hăng mrô mơnuih mă bruă tui hră pơkôl, Khua dêh čar ta rơkâo khom hmâo hơdră bruă lăp djơ̆, ƀu pioh mơnuih mă bruă tui hră pơkôl ƀu hmâo tŭ yua hơdră bruă./.