VOV4.Jarai - Lơ 3/3, ƀơi ƀirô mă bruă Kơnuk kơna, Khua dêh čar ta, ơi Phạm Bình Minh git gai mông jơnum Kơnuk kơna tui tơđar blan 2/2022. Tui tơlơi lăi pơthâo glăi amăng mông jơnum, tơlơi bơwih ƀong – mơnuih mơnam blan 2 hăng 2 blan akô̆ thun hmâo pơplih klă, pơplih phrâo, hơkrŭ glăi dong amăng abih bang bruă wot bruă măi mok, bruă đang hmua, sĭ mơdrô, hơkrŭ glăi anih anom mă bruă, djă kơjăp hơđong bruă kơđi čar, pơhlôm hơđong mơnuih mơnam.

Gah bruă mă pơ̆ anăp anai, Khua dêh čar črâo rơđah, anai lĕ mông yôm phăn, kiăng pơtrut tañ hăng ngă tui ba glăi bôh tơhnal hơdôm bruă kiăng pơjing jơlan nao pơplih phrâo hơdôm bruă mă amăng sa thun. Khua dêh čar rơkâo hơdôm ding jum, gơnong bruă, ƀirô, plơi pla lăng tui bruă mă, ngă tui khop hăng ngă giong prong hloh hơdôm tơhnal bruă pơkă pơđĭ kyar bơwih ƀong mơnuih mơnam thun 2022 dưi hmâo ba tơbiă amăng anun đing nao ngă giong hơdôm akô̆ bruă lăi pơthâo kơ Ding jum kơđi čar, Grŭp mă bruă Ping gah, pơhlôm klă, rơnoh bruă. Pok pơhai ba glăi bôh tơhnal hơdôm bruă mă, jơlan pơsir mơng Jơlan hơdră hơkrŭ glăi hăng pơđĭ kyar bơwih ƀong mơnuih mơnam, biă ñu bruă mă khom ngă tui amăng 3 blan tal sa thun 2022./.

Siu H’ Prăk: Pơblang