VOV4.Jarai - Ƀơi Ƀirô mă bruă Kơnuk kơna, Khua dêh čar ta ơi Phạm Minh Chính, Khua Grŭp Črâo ba bruă pơgang pơgăn Covid-19 dêh čar ta phrâo git gai mông Jơnum tal 16, dưi pơphun lăng nao rai mơng ataih kơplah wah glông tô Kơnuk kơna hăng 63 bôh tơring čar, ƀôn prong. Pơhiăp amăng mông klah čun mông jơnum, Khua dêh čar ta ơi Phạm Minh Chính lăi rơđah tơhnal yôm phăn mơng bruă jơnum Grŭp črâo ba ƀơi anăp pơplih mơng klin Covid-19; mơng anun pơsit hăng ba tơbiă hơdôm tơhnal pơkă, bruă mă, jơlan gah pơsir djơ̆ pơ̆ anăp anai kiăng wai lăng dong klin Covid-19 ngă amăng đơ đam dêh čar. Lăi rơđah tơlơi klin ngă tơnap, ƀu thâo him lăng hlâo, lu djuai phrâo pơplih, amăng anun pran kơdŏng glăi vaccine tơdu tui thun blan, Khua dêh čar ta črâo rơđah, khut khăt ƀu dưi lui raih. Khua dêh čar pơsit: Tơhnal pơkă lĕ khut khăt ƀu pioh klin gluh glăi. Pơtrut kơtang hăng tañ hloh dong bruă tlâ̆o vaccine./.

Siu H’ Prăk: Pơblang