VOV4.Jarai - Tơdơi kơ hyu hơduah ĕp ƀơi sa dua anih anom, bruă mă, rơwang bruă phun, mơguah lơ 13/3, Khua dêh čar ta, ơi Phạm Minh Chính hăng grŭp hyu mă bruă mơng Kơnuk kơna hmâo mă bruă laih hăng khua mua phun tơring čar Khánh Hòa. Khua mua hơdôm ding jum, gơnong bruă dêh čar ta lăi lĕ, tơring čar Khánh Hòa lĕ anih anom yôm phăn hăng hmâo anô̆ gal prong pơđĭ kyar bơwih ƀong – mơnuih mơnam ƀơi kual Dơnung Tŏng Krah dêh čar hăng kual Dăp Kơdư, samơ̆ akă dưi mă yua abih anô̆ gal pioh pơđĭ kyar.

Anih anom mông mă bruă

Pơhiăp amăng mông klah čun, Khua dêh čar ta ơi Phạm Minh Chính lăi rơđah, Khánh Hòa hmâo anih anom yôm phăn amăng pơđĭ kyar bơwih ƀong mơnuih mơnam hăng rơnuk rơnua lŏn ia mơng dêh čar, Khánh Hòa khom lăi pơthâo, pok pơhai, ngă tui ba glăi bôh tơhnal Tơlơi pơtrun pơsit Jơnum tal 13 mơng Ping gah hăng Tơlơi pơtrun pơsit Jơnum Ping gah tơring čar; mă yua, ngă tui jơlan gah mơng Ping gah, hơdră bruă tơlơi phiăn mơng Kơnuk kơna, tơlơi črâo ba git gai mơng Gong gai dêh car. Khánh Hòa khom ngă tui pran kơtang gum hrom hơbit, gơgrong pô; Kơtưn pơpha gưl, bruă apăn, pơphun phrâo bruă gơgrong nao hrom hăng pel ĕp, lăng tui, wai lăng tơlơi dưi; hmâo bruă pel ĕp, lăng tui ba glăi bôh tơhnal pok pơhai mơng rim gưl./.

Siu H’ Prăk: Pơblang