VOV4.Jarai - Mơguah lơ 25/7, ƀơi Hà Nội, Ping gah Khul ling tơhan dêh čar ta, Ding jum khul ling tơhan pơphun Jơnum Ping gah Khul ling tơhan dêh čar 6 blan akô̆ thun 2022. Ơi Phạm Minh Chính, Khua dêh čar ta, Ding kơna apăn bruă Ping gah Khul ling tơhan nao pơhmư̆ hăng črâo ba bruă Jơnum. 6 Blan akô̆ thun 2022, Ping gah Khul ling tơhan, Ding jum khul ling tơhan git gai, črâo ba abih bang khul ling tơhan gum hrom hơbit, pơlir hơbit, gir run hrưn đĭ, ngă giong abih bang hơdôm bruă jao, lu bruă jao ngă giong klă, hmâo bruă ngă giong klă prong.

Gah bruă phun 6 blan rơnuč thun, abih bang khul ling tơhan gơgrong hlâo, tañ thâo, pơkă lăng hlâo tañ, pơsit djơ̆ tơlơi, hmao tlôn pơphô kơ Ping gah, Kơnuk kơna hmâo hơdră bruă pơsir truh kih hơdôm tơlơi. Pơphô brơi dong bruă mă yua, pok pơhai hơdôm bruă, akô̆ bruă, rơwang bruă, glông tơlơi phiăn kơ ling tơhan, pơgang lŏn ia; ngă klă hơdră pơtrun pơkĕ hrom pơgang lŏn ia hăng bơwih ƀong mơnuih mơnam; Pok pơhai kơjăp bruă pơgang lŏn ia ƀơi ding jum, gơnong bruă tơring čar, ƀôn prong hăng pơtô pơhrăm pơgang lŏn ia, rơnuk rơnua plơi pla, kual ia rơsĭ, guai dêh čar, amăng lŏn ia, pơgang kơjăp pô, lŏn ia pô, hơdôm bruă pơđĭ kyar bơwih ƀong gah ia rơsĭ./.

Siu H’ Prăk: Pơblang