VOV4.Jarai - Čơtlăm lơ 10/2, ƀơi ƀôn prong Hà Nội, Khua dêh čar ta ơi Phạm Minh Chính nao pơhmư̆ hăng đĭ pơhiăp črâo ba amăng mông ngă Lơphet lăi pơthâo Jơlan hơdră tơlơi suaih pral ƀơi sang hră rơwang mơng thun 2021-2025 dưi pơphun lăng nao rai mơng ataih mơng Anom Jơnum jar kơmar Hà Nội hăng 63 bôh tơring čar, ƀôn prong hăng tô nao rai truh rơbêh kơ 41.950 bôh sang hră amăng đơ đam dêh čar ta. Hrom hăng bruă pok bah amăng sang hră glăi amăng đơ đam dêh čar, anai lĕ tơlơi yôm phăn, pơsit pran prong mơng Ping gah hăng Kơnuk kơna amăng bruă pơđĭ tui anô̆ kơjăp bruă bơwih brơi, pơgang ba čơđai muai, čơđai sang hră. Jơlan hơdră tơlơi suaih pral ƀơi sang hră rơwang mơng thun 2021-2025 pơsit 5 ƀut bôh yôm hăng 7 ƀut jơlan gah pơsir kơ bơwih brơi tơlơi suaih pral hăng wai lăng tơlơi suaih pral, čơđai muai, čơđai sang hră; pơtô juăt drơi jăn pran jua hăng bruă bơkơjăp drơi jăn ƀơi sang hră; pơphun mông ƀong huă ƀơi sang hră, pơhlôm gơnam ngă bơbuă djơ̆; pơtrut kơtang mă yua hơdră phrâo măi mok amăng wai lăng, git gai, lăng tui, jŭ yap, lăi pơthâo glăi; lăi pơhing, pơtô juăt tơlơi suaih pral ƀơi sang hră. Pơhiăp ƀơi anai, Khua dêh čar ta ơi Phạm Minh Chính jao bruă kơ hơdôm ding jum, ƀirô, tơring čar, ƀôn prong, hrom hăng anun iâu pơhrui tơlơi gum hrom mơng hơdôm khul grŭp, pok pơhai pơhrua nao hrom hăng hơdôm akô̆ bruă, jơlan hơdră, kơčăo bruă bơdjơ̆ nao kiăng pơtrut kơtang bruă bơwih brơi abih bang, ha amăng plĕ gah drơi jăn pran jua kơ čơđai mua, čơđai sang hră./.

Siu H’ Prăk: Pơblang