VOV4.Jarai - Mơguah lơ 26/1, Khua dêh čar ta ơi Phạm Minh Chính nao pơhmư̆ mông ngă lơphet mă yua Tơdrông toa Cửa Lục 1 hăng jơlan pơgang ia rơsĭ Hạ Long – Cẩm Phả rơwang sa. Ring bruă dưi pơphun pơkra mơng lơ 28/4/2020, dăp hơdră 6 jơlan rơdêh đuăi, ataih abih bang 4.265m, abih bang rơnoh tuh pơplai rơbêh kơ 2.100 klai prăk. Jơlan pơgang rôk tui tơring čar ƀu djơ̆ kơnong kơ tô nao rai 2 plơi prong phun mơng tơring čar lĕ Hạ Long hăng Cẩm Phả ôh mơ̆, ñu dô̆ tô nao rai 2 gru grua Tŏng Wing Hạ Long – Bái Tử Long, ngă gal brơi bruă nao rai, pơhlôm kơ mơnuih ƀôn sang. Hrom hăng anun, djru mă yua djơ̆ hơdôm anô̆ gal gah lŏn dron amăng kual jơlan găn nao, ngă gal brơi kơ pơđĭ kyar sĭ mơdrô, tuai čuă ngui, anih sĭ mlia, pơjing lu tơdrun jưh hăng kual plơi prong rôk tui jơlan. Pơhiăp amăng mông ngă lơphet mă yua, Khua dêh čar ta ơi Phạm Minh Chính lăi rơđah, ring bruă, rơwang bruă pran pơtrut phun tơring čar Quảng Ninh hmâo hăng glăk pok pơhai klă pơsit bôh tơhnal truh kih mơng tơring čar amăng ngă tui hơdôm tơlơi pơplih bruă pơđĭ kyar jơlan nao rai, rơnuk anai, pơhlôm hluh gah abih bang, pơtrut tô nao rai kual, amăng kual./.

Siu H’ Prăk: Pơblang