VOV4.Jarai - Tŏ tui hơdôm hrơi jơnum lok 3, Khua pơ ala mơnuih ƀon sang dêh čar tal 15, tom hrơi (25/5), bơkơtuai ƀơi grup kơ bruă bơwih ƀong huă-mơnuih mơnam hăng pơhrui ngăn drăp kơnuk kơna amăng hơdôm blan akŏ thun 2022, ƀing khua mua lăng yôm  hơdôm tơlơi gir run mơng kơnuk kơna kiăng hơkrŭ glăi tơlơi bơwih ƀong huă amăng hrơi blan laih rơgao. Lu khua mua tŭ ư hăng hră lăi pơthâo mơng Kơnuk kơna mơ-it kơ Khua pơ ala mơnuih ƀon sang dêh čar, boh tha anai lĕ pơƀut glăi mơng hơdôm tơlơi gir run khut khăt, ƀu pơdơi pran amăng thun blan laih rơgao. GDP rơwang tal I thun anai đĭ 5,03%, bruă bơwih ƀong huă pok prong hơđong, djop gơnong bruă, anom bruă glăi pơđĭ kyar glăi dong. Samơ̆, ƀing khua mua ăt bơngŏt kơ bruă ia jâu đĭ amra bơdjơ̆ nao nua sĭ gơnam tam, rơnoh prăk pơdŭ pơgiăng. Tơdah ñu pơgăn hĭ bruă đĭ nua ia săng, ia jâu amra jing domino đĭ nua amăng hơdôm gơnam pơkŏn dong. Amăng mông jơnum bơkơtuai, Khua mir sir ơi Nguyễn Xuân Phúc lăi pơtong, ƀing khua mua ƀudah Khua pơ ala mơnuih ƀon sang dêh čar anăm pơtah tai. Đing nao rơnoh pơsur bơwih ƀong huă, tuh pơ alin bruă čar kiăng hơmâo pơtrut klă ƀiă dong, mut hrŏm amăng tơlơi hơdip mơda kiăng kơ hmao tlôn djru brơi mơnuih ƀon sang, anom bơwih ƀong sĭ mơdrô kah hăng hơdră bruă mơng Ping gah, Kơnuk kơna. Khua mir sir ơi Nguyễn Xuân Phúc ba boh pơhiăp mơng sa črăn lăi pơthâo lĕ “Anăm brơi bruă rơnoh prăk trun nua ngă glêh tơnap kơ mơnuih ƀon sang”.

Siu Đoan: Pơblang